Bəner
Bəner
Bəner
Bəner
Bəner
Bəner
Bəner
Bəner
Bəner
Bəner

contacts_white

TEL: 464 41 56

FAX: 464 41 57

office@iswm.az; www.iswm.az

AZ1025, Bakı, Azərbaycan, Xocalı prospekti 55, AĞA İş Mərkəzi

Xəbərlər
Azərbaycanda məişət tullantılarının zərərsizləşdirilməsi üçün ilk sanitar poliqon tikilib PDF faylını al Çap E-poçt
Azərbaycan Respublikası İqtisadiyyat Nazirliyi və Dünya Bankı tərəfindən birgə həyata keçirilən “Bərk məişət tullantılarının vahid idarəçiliyi layihəsi” çərçivəsində Balaxanı məişət tullantılarının zərərsizləşdirilməsi poliqonu müasir ekoloji-sanitar normalara uyğun şəkildə tam bərpa edilmişdir. Balaxanı poliqonunun növbəti 20 il müddətində istismarı məqsədilə ən yüksək beynəlxalq standartlara cavab verən sanitar poliqonuna çevrilməsi istiqamətində tikinti işlərinin həyata keçirilməsinə 2015-ci ilin əvvəlində başlanılmışdır. Poliqonun “Böyük Şor” gölünün sahilində və mürəkkəb relyefi olan bir ərazidə yerləşməsinə baxmayaraq bərpa və tikinti işləri müvəffəqiyyətlə icra olunmuşdur. Poliqonların reabilitasiyası işləri Türkiyənin “Gökşin İnşaat” və Yunanıstanın "Mesogeos S.A." şirkətləri konsorsiumu tərəfindən həyata keçirilmişdir. Aparılan bərpa işləri nəticəsində 60 hektara yaxın ərazidə torpaqlama işləri yekunlaşmış və müvafiq olaraq 2.9 mln. m² material bütövlüklə xüsusi müxtəlif təyinatlı (geogrid, geotekstil, geomembran və s.) təcrid layları ilə örtülmüşdür. Ümumilikdə poliqon üzrə tullantıların zərərsizləşdirilməsi üçün 26 xüsusi hücrə inşa edilmiş və inşa olunan ərazidə təxminən 9.7 mln ton tullantıların zərərsizləşdirilməsi imkanı yaranmışdır. Eyni zamanda, Balaxanı poliqonunda çirkab və yağış sularının və bioqazların toplanması məqsədilə 40 km-ə yaxın müxtəlif ölçüdə yüksək sıxlıqlı polietilen borular, 15 xüsusi lyuk, çirkab suların ilkin təmizlənməsi üçün tutumları müvafiq olaraq 1500 m3 və 400 m3 olan 2 hovuz, 3 km uzunluğunda xəndəklər, 400-dən çox qaz bacalarından ibarət şəbəkə qurulmuşdur. Poliqon ərazisində tullantılardan əmələ gələn çirkab sularının təmizlənməsi məqsədilə gündəlik istismar gücü 80 m3 olan əks osmos tipli xüsusi təmizləyici qurğu sahədə inşa edilmişdir. Eyni zamanda, formalaşan bioqazların toplanması və enerjiyə çevrilməsi məqsədilə vahid istilik və enerji qurğusu yerləşdirilmişdir. Poliqon ərazisində həmçinin abadlıq və eroziyanın qarşısının alınması üçün yaşıllaşdırma işləri aparılmışdır. Qeyd edək ki, tikinti-bərpa işlərinə texniki nəzarət Almaniyanın “Fichtner” şirkəti tərəfindən həyata keçirilmişdir.







 
Bərk məişət tullantılarının idarəçiliyinə dair Milli Strategiya hazırlanır PDF faylını al Çap E-poçt
İqtisadiyyat və Sənaye Nazirliyinin təşkilatçılığı ilə bərk məişət tullantılarının idarəçiliyinə dair Milli Strategiyanın Konsepsiya Sənədinə dair Seminar keçirilmişdir. Tədbirdə müxtəlif dövlət qurumlarının, beynəlxalq təşkilatlar və məsləhətçi şirkətlərin nümayəndələri iştirak etmişlər.

Tədbirdə çıxış edən iqtisadiyyat və sənaye nazirinin müavini, "Bərk Məişət Tullantılarının Vahid İdarəçiliyi Layihəsi"nin idarəetmə qrupunun direktoru Sahil Babayev qeyd etmişdir ki, ətraf mühitin mühafizəsi, əhalinin sağlamlığının qorunması, bərk məişət tullantılarının idarə edilməsinin müasirləşdirilməsi və yenidənqurulması ölkəmizdə prioritet istiqamətlərdəndir. Vurğulanmışdır ki, Bakı şəhərində məişət tullantıları ilə bağlı idarəetmənin təkmilləşdirilməsi barədə Azərbaycan Respublikası Prezidentinin Sərəncamına uyğun olaraq, paytaxt ərazisində əmələ gələn bərk məişət tullantılarının yerləşdirilməsi və zərərsizləşdirilməsi məqsədilə "Təmiz Şəhər" ASC yaradılmış, Balaxanı qəsəbəsində Bakı Bərk Məişət Tullantılarının Yandırılması və Bərk Məişət Tullantılarının Çeşidlənməsi zavodları istifadəyə verilmişdir. Hazırda Balaxanıda Eko-Sənaye Parkı yaradılmaqdadır.

Bərk məişət tullantılarının idarə olunmasının təkmilləşdirilməsi məqsədilə 2009-cu ildən etibarən İqtisadiyyat və Sənaye Nazirliyi və Dünya Bankı tərəfindən uğurla həyata keçirilən "Bərk məişət tullantılarının vahid idarəçiliyi layihəsi" çərçivəsində Qaradağ və Suraxanı poliqonları tam bərpa edilmiş, bərk məişət tullantılarının idarəçiliyi üzrə Böyük Bakı Strategiyası və Bakı şəhərində tullantıların toplanması və daşınması sisteminin optimallaşdırılmasına dair hesabat hazırlanmış, tullantıların elektron informasiya sisteminin tətbiqinə başlanılmış, Bakı şəhəri və onun ətraf rayonlarındakı 41 iri qeyri-qanuni tullantı sahələri bağlanmış, paytaxtda toplama və daşınma sisteminin təkmilləşdirilməsi üçün 3239 müxtəlif ölçülü tullantı konteynerləri və 29 ədəd tullantı daşıyan yük maşınları ilə təchiz olunmuşdur.

Layihənin 2014-2016-cı illəri əhatə edən ikinci mərhələsində Balaxanı poliqonunun yenidən qurulması işlərinə, habelə Bərk Məişət Tullantılarının İdarəçiliyinə dair Milli Strategiya, Texniki İqtisadi Əsaslandırma və Regional İnvestisiya Planlarının hazırlanmasına başlanılmışdır. Bu məqsədlə beynəlxalq məsləhətçi şirkətlərin konsorsimu cəlb edilmiş və onlar tərəfindən ölkəmizdə bərk məişət tullantılarının idarə edilməsinin cari vəziyyətinin öyrənilməsi məqsədilə 11 pilot sahədə tullantıların tərkibinin və həcminin müəyyənləşdirilməsinə dair tədqiqatlar, ölkənin yol şəbəkəsinə, relyef, geoloji, hidrogeloji və topoqrafik xüsusiyyətlərinə, çay və göl şəbəkəsinə dair araşdırmalar aparılmış, müxtəlif dövlət qurumlarından alınmış statistik məlumatlar, rayon və şəhərlərdən daxil olmuş sorğular təhlil edilmişdir. Bu məlumatlar əsasında məsləhətçi şirkət ölkə ərazisində bərk məişət tullantılarının davamlı idarə edilməsinə dair daşınma, toplama və zərərsizləşdirmə sisteminin qurulmasının optimal seçimi kimi regional sanitar poliqon və ötürücü məntəqələr şəbəkəsinin yaradılmasını təklif etmiş və sahə üzrə hüquqi, inzibati, maliyyə, institusional və texnoloji islahatlara dair seçim və inkişaf ssenarilərini özündə əks etdirən Konsepsiya Sənədinin layihəsini hazırlamışdır. Aidiyyəti dövlət qurumlarının rəy və təklifləri nəzərə alınmaqla Konsepsiya Sənədinin əsasında Bərk Məişət Tullantılarının İdarəçiliyinə dair Milli Strategiyanın yekun layihəsi hazırlanacaq və hökumətə təqdim ediləcəkdir.

Dünya Bankının Azərbaycandakı nümayəndəliyinin rəhbəri xanım Larisa Leşçenko Bank və Azərbaycan arasında əməkdaşlığın çoxşaxəli olduğunu və bir sıra sahələri əhatə etməklə uğurla davam etdirildiyini qeyd etmiş, layihəyə dair fikirlərini bölüşmüşdür.

"Təmiz Şəhər" ASC-nin İdarə Heyətinin sədri Zakir İbrahimov isə çıxışında qurumun fəaliyyəti, Bakı şəhərində bərk məişət tullantılarının zərərsizləşdirilməsi və yerləşdirilməsi sahəsində gördüyü işlər barədə danışmışdır.

Sonra Azərbaycanda bərk məişət tullantılarının idarəçiliyi sahəsindəki mövcud vəziyyətə və qarşıya qoyulan hədəflərə, Bərk Məişət Tullantılarının İdarəçiliyinə dair Milli Strategiyanın məqsədlərinə və Konsepsiya Sənədinə dair təqdimatlar keçirilmişdir.

Tədbirdə aidiyyəti qurumlar Konsepsiya Sənədinin layihəsinə dair rəy və təkliflərini bildirmişlər.
 
Dünya Bankının vitse-prezidenti İqtisadiyyat və Sənaye Nazirliyində olmuşdur PDF faylını al Çap E-poçt

Noyabrın 4-də iqtisadiyyat və sənaye naziri Şahin Mustafayev Dünya Bankının Avropa və Mərkəzi Asiya regionu üzrə vitse-prezidenti xanım Lora Таkın rəhbərlik etdiyi nümayəndə heyəti ilə görüşmüşdür.

Görüşdə Azərbaycan və Dünya Bankı arasında əlaqələrin mövcud vəziyyəti və əməkdaşlıq perspektivləri müzakirə edilmişdir.

Nazir Şahin Mustafayev beynəlxalq maliyyə institutları ilə birgə həyata keçirilən layihələrin əhəmiyyətini qeyd etmiş, qabaqcıl beynəlxalq təcrübənin, texnologiya və yeniliklərin tətbiq olunduğunu vurğulamışdır. Dünya Bankı ilə əməkdaşlığın çoxşaxəli olduğunu qeyd edən Şahin Mustafayev hazırda iqtisadiyyatın diversifikasiyası, qeyri-neft sektorunun inkişafı və biznes mühitinin daha da yaxşılaşdırılması sahəsində işlərin davam etdirildiyini diqqətə çatdırmışdır. Bildirilmişdir ki, indiyədək Dünya Bankı tərəfindən Azərbaycana 51 layihə çərçivəsində 3,6 mlrd. dollar kredit ayrılmışdır. Hazırda nəqliyyat, su təchizatı və kanalizasiya, sosial və s. sahələrdə 18 layihənin icrası davam edir. Dünya Bankının dəstəyi ilə həyata keçirilən "Bərk məişət tullantılarının vahid idarəçiliyi" layihəsi Bakı şəhərində tullantıların idarə edilməsi baxımdan əhəmiyyətlidir.

Ekoloji layihələrin davamı olaraq, Bakı şəhərində göllərin ekoloji vəziyyətinin yaxşılaşdırılması, o cümlədən Böyükşor gölünün təmizlənməsi sahəsində görülən işlər, eləcə də Balaxanı Sənaye Parkı və parkın rezidentləri üçün tətbiq olunan güzəştlər barədə məlumat verən nazir Şahin Mustafayev bu sahədə Dünya Bankı ilə mümkün əməkdaşlıq barədə fikirlərini bidirmişdir.

Dünya Bankının Avropa və Mərkəzi Asiya regionu üzrə vitse-prezidenti xanım Lora Таk ölkəmizə səfəri çərçivəsində Azərbaycan Respublikasının Prezidenti cənab İlham Əliyev tərəfindən qəbul edildiyini, Azərbaycanda Dünya Bankı ilə əlaqələrə böyük önəm verildiyini vurğulamışdır. Xanım Таk Azərbaycan və Dünya Bankı arasında səmərəli əməkdaşlığın həyata keçirildiyini qeyd edərək, bu nüfuzlu maliyyə institutunun ölkəmizdə həyata keçirilən layihələrə bundan sonra da maliyyə və texniki dəstək göstərəcəyini bildirmişdir.

Görüşdən sonra Dünya Bankının Avropa və Mərkəzi Asiya regionu üzrə vitse-prezidenti xanım Lora Таkın rəhbərlik etdiyi nümayəndə heyəti Bərk Məişət Tullantılarının Çeşidlənməsi və Yandırılması zavodlarında olmuşdur. Qonaqlara zavodlar barədə məlumat verilmiş və vurğulanmışdır ki, Bərk Məişət Tullantılarının Yandırılması Zavodu istehsal gücünə görə Şərqi Avropada və MDB məkanında ən iri bu tipli müəssisədir. Dördüncü nəsil (4G) texnologiyalarının tətbiqi ilə qurulmuş zavod Avropa Birliyinin ətraf mühitin mühafizəsi sahəsində ən sərt normativlərinə tam cavab verir.

Dünya Bankının nümayəndələri həmçinin, Balaxanı bərk məişət tullantılarının zərərsizləşdirilməsi poliqonunun fəaliyyəti, Böyükşor gölünün təmizlənməsi sahəsində görülən işlərlə tanış olmuş, bu böyük ekoloji layihələri yüksək qiymətləndirmişlər.

 
Suraxanı və Qaradağ rayonları ərazisində yerləşən tullantı poliqonları bərpa olunmuşdur PDF faylını al Çap E-poçt

İqtisadiyyat və Sənaye Nazirliyi və Dünya Bankı tərəfindən birgə həyata keçirilən “Bərk məişət tullantılarının vahid idarəçiliyi layihəsi” çərçivəsində Suraxanı və Qaradağ rayonlarının inzibati ərazisində yerləşən “Təmiz Şəhər” ASC-nin tabeçiliyindəki fəaliyyəti dayandırılmış tullantı poliqonunda bərpa işləri görülmüşdür.

Poliqonların reabilitasiyası işləri Türkiyənin “Gökşin İnşaat” şirkəti tərəfindən həyata keçirilmişdir. Suraxanı rayonu ərazisindəki poliqonda əvvəllər atılmış 250 min m3 tullantı zərərsizləşdirmə sahəsinə toplanmış, 155 min m2 sahədə torpağın hamarlanması işləri görülmüşdür. Qaradağ rayonu ərazisində yerləşən poliqon üzrə isə əvvəllər atılmış 326 min m3 tullantı zərərsizləşdirmə sahəsinə toplanmış və 60 min m2 sahədə torpağın hamarlanması işləri görülmüşdür. Hər iki poliqon ərazisi hasarlanmışdır.

Poliqonlarda beynəlxalq standartlara uyğun olaraq qaz, hava və su keçirməyən süni qatlar daxil olmaqla qazların və suların (o cümlədən çirkab sularının) toplanması və zərərsizləşdirilməsi üçün örtük sistemləri, mexaniki və elektrik qurğular vasitəsilə çirkab sularının toplanması sistemləri, eləcə də suvarma sistemləri quraşdırılmışdır.

Qeyd edək ki, reabilitasiya işlərinə texniki nəzarət Almaniyanın “Fichtner” şirkəti tərəfindən həyata keçirilmişdir.

 
Tullantıların idarə olunması sahəsində təhsil imkanları genişləndirilir PDF faylını al Çap E-poçt

kamal and faigNorthampton Universiteti Azərbaycan Memarlıq və İnşaat Universiteti (AzMİU) ilə Anlaşma Memorandumunun imzalanmaqla beynəlxalq əməkdaşlığını daha da inkişaf etmişdir.

Northampton Universitetinin rektor müavini Nik Petford 24 mart 2014-cü il tarixində AzMİU rektoru Professor Gülçöhrə Məmmədova ilə işçi sənədini imzalamışdır. İki universitet tələbə mübadiləsi üzrə əməkdaşlığı formalaşdırır və bu əməkdaşlıq həmçinin biliklərin ötürülməsi fəaliyyətləri və birgə tədqiqat imkanlarına təkan verəcəkdir.

Tullantıların davamlı idarə edilməsi üzrə beynəlxalq aləmdə Mütərəqqi Mərkəz kimi tanınan Northampton Universiteti əməkdaşlığa rəhbərlik edir və AzMİU özünün Mütərəqqi Mərkəzinin yaradılması üçün Northamton Universitetinin yolu ilə getmək arzusundadır. Hər iki Universitet arasında əməkdaşlıq edilməsi təşəbbüsü bu yaxınlarda Northampton Universitetinin məzunu olan və İqtisadiyyat və Sənaye Nazirliyinin Bərk Məişət Tullantılarının Vahid İdarəçiliyi Layihəsində ətraf mühit və tullantıların idarəedilməsi üzrə mütəxəssis vəzifəsində çalışan Faiq Sadıqova məxsusdur. Faiq Sadıqov Northampton Universitetini bitirən ilk Azərbaycanlı tələbədir və o Azərbaycanın tullantılar üzrə ilk strategiyanın yazılmasında mühüm rol oynamışdır. 

Memorandumun imzalanmasına AzMİU-nun rektoru Gülçöhrə Məmmədova, professor Fəqan Əliyev (Mühəndislik kafedrasının müdiri) və Arif Nəcimov (xarici proqramlar şöbəsi), Northampton Universiteti tərəfindən Ruth Kopeland-Filips (Elm və Texnologiyalar Kafedrası) şahidlik etmişlər. 

Northampton Universiteti tələbələr üçün qlobal təcrülərin əldə edilməsi üçün beynəlxalq əməkdaşlıq üzrə etibarlı tərəf sayılır.

 

http://www.northampton.ac.uk/news/university-of-northampton-furthers-international-reach-by-signing-memorandum-of-understanding-with-azerbaijan-university-of-architecture-and-construction

 
«BaşlamaqƏvvəlki123456NövbətiAxırıncı»

Səhifə 1 > 6

2010-2017 Copyright ISWM, Azerbaijan. Support: NetSoft